Involución musical

Cando explicamos a historia da música e dos instrumentos musicais sempre xurde o concepto de economía ou practicidade, según se mire. A que nos referimos? Pois a cómo a evolución dos instrumentos fixo que aqueles que precisaban de máis dunha persoa para ser interpretados se foran perfeccionando para que un só individuo fixese o papel que antes facían varios; é o caso da batería: nace desmembrada dentro das bandas militares; ó xurdiren as primeiras bandas de jazz os músicos deciden agrupar tódalas súas partes e que unha soa persoa sexa quen as toque, economizando claramente na man de obra pois o salario que se debía repartir entre catro (por tocar cada unha bombo, caixa, pratos ou timbais) agora se reducirá a un.

Pois parece que a algúns lles parece moi interesante dar uns cantos pasos atrás (en canto a técnica se refire pero dende logo non en creatividade e orixinalidade) e facer que unha guitarra sexa interpretada non por dúas persoas, nin tres, nin … CINCO persoas, nada máis e nada menos son as que tocan neste precioso tema que aquí vos presentamos e que debemos dar gracias por telo coñecido a Rosa, que sempre nos sorprende con cousas curiosas e interesantes. 

Abride as orellas e fixádevos no que fai cada un: percusión, baixo, acordes, melodía… todo colle! E a cara chea de profunda reflexión do intérprete con sombreiro é un poema, moi acorde co que a el lle corresponde tocar.